ಮುಕ್ತ ತಂತ್ರಾಂಶದ ಬಳಕೆ ಐ.ಟಿ ಕಂಪೆನಿಗಳ ಜೊತೆಗೆ ಶಾಲೆಗಳು, ಕಾಲೇಜು ಮತ್ತು ಸರ್ಕಾರೀ ಒಡೆತನದ ನಿಗಮಗಳಿಗೂ ಹಬ್ಬಿರುವುದು ಇತ್ತೀಚೆಗೆ ಸಾಮಾನ್ಯ ಸುದ್ದಿ. ಜೊತೆಗೆ ಸರ್ಕಾರವೇ ಮುಕ್ತ ಮತ್ತು ಸ್ವತಂತ್ರ ತಂತ್ರಾಂಶವನ್ನು ಉಪಯೋಗಿಸಿಕೊಂಡು ಸಿದ್ದವಾಗಿರುವ ಆಕಾಶ್ ಕಡಿಮೆ ಬೆಲೆಯ ಟ್ಯಾಬ್ಲೆಟ್ ಕೂಡ ಬಿಡುಗಡೆ ಮಾಡಿದ್ದನ್ನು ಕೇಳಿದ್ದೀರಲ್ಲವೆ. ಇದರ ಲಾಭವಾದರೂ ಏನು ಎಂದು ಕೇಳಿದರೆ, ಉತ್ತರವೂ ತಟ್ಟನೆ ಸಿಕ್ಕೀತು. ಸ್ವಾತಂತ್ರ್ಯದ ಜೊತೆಗೆ ತೆರಿಗೆದಾರರ ಹಣ ಉಳಿತಾಯ. ಈಗ ಅಂತಹದ್ದೇ ಒಂದು ವಿಷಯ ನಿಮ್ಮ ಮುಂದೆ… ಕೇರಳದಿಂದ.
ಕೇರಳ ರಾಜ್ಯ ವಿದ್ಯುತ್ ನಿಗಮ (KSEB) ಕೆಲವೇ ಕೆಲವು ವರ್ಷಗಳ ಹಿಂದೆ ಮುಕ್ತ ತಂತ್ರಾಂಶಗಳ ಮೊರೆ ಹೋಗಿತ್ತು. ಕೇರಳದಾದ್ಯಂತ ತನ್ನ ಗ್ರಾಹಕರ ವ್ಯವಹಾರ, ಲೆಕ್ಕಾಚಾರಗಳನ್ನು ನೋಡಿಕೊಳ್ಳುವುದಲ್ಲದೇ ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳಿಂದ ವರ್ಷಾನುವರ್ಷ ಕೆ.ಎಸ್.ಇ.ಬಿ ಕೋಟ್ಯಂತರ ರೂಪಾಯಿ ಉಳಿಸುತ್ತಿದೆ.
ಓರುಮ ಹೆಸರಿನ ಬಿಲ್ಲಿಂಗ್ ತಂತ್ರಾಂಶವನ್ನು ೨೦೦೬ ರಲ್ಲಿ ಪರಿಚಯಿಸಿದ ಕೆ.ಎಸ್.ಇ.ಬಿ, ಇದುವರೆಗೆ ಹಿಂತಿರುಗಿ ನೋಡಿದ್ದಿಲ್ಲ. ಒರುಮಾದ ಪರಿಚಯದ ನಂತರ ಸರಸ್ ಅಕೌಂಟಿಂಗ್ ತಂತ್ರಾಂಶ ಕೂಡ ಪರಿಚಯವಾಯ್ತು. ಇದರ ಫಲಿತಾಂಶವೇ ೭-೮ ಕೋಟಿ ರೂಪಾಯಿಗಳ ಉಳಿತಾಯ.
ಡೆಬಿಯನ್ ಸರ್ವರ್ಗಳು, ಉಬುಂಟು ಡೆಸ್ಕ್ತಾಪ್ಗಳು. ಪೋಸ್ಟ್ಗ್ರೆಸ್ ಎಸ್.ಕ್ಯೂ.ಎಲ್ , ಪಿ.ಎಚ್.ಪಿ, ಜೆ-ಬಾಸ್ , ಅಪಾಚೆ ವೆಬ್ಸರ್ವರ್ ಹೀಗೆ ಹತ್ತು ಹಲವು ಮುಕ್ತ ಹಾಗೂ ಸ್ವತಂತ್ರ ತಂತ್ರಾಂಶಗಳನ್ನು ಬಳಸಿ, ತನ್ನದೇ ಸ್ವಂತ ಡೆವೆಲಪರ್ಗಳ ಸಹಾಯದಿಂದ ಕೆ.ಎಸ್.ಇ.ಬಿ ಈ ಸಾಧನೆಯನ್ನು ಮಾಡಿದೆ. ನಿಗಮಕ್ಕೆ ನಿಜಕ್ಕೂ ಖರ್ಚಾದ ಹೆಚ್ಚುವರಿ ಮೊತ್ತವೆಂದರೆ ೩೫೦೦೦ ರೂಪಾಯಿಗಳು, ತನ್ನ ನೌಕರರಿಗೆ ಈ ತಂತ್ರಾಂಶ ಉಪಯೋಗಿಸುವುದನ್ನು ಕಲಿಸಲು ಮಾತ್ರ.
ಈ ತಂತ್ರಾಂಶಗಳಿಗೆ ಬೇಕಾದ ಹೆಚ್ಚುವರಿ ಇ-ಬಿಲ್ಲಿಂಗ್ ಗೆ ತಂತ್ರಾಂಶವನ್ನು ಟಿ.ಸಿ.ಎಸ್ ಅಭಿವೃದ್ದಿ ಪಡಿಸಿ ಸರಸ್ ನೊಂದಿಗೆ ಜೋಡಿಸಿದೆ. ವ್ಯಾವಹಾರಿಕ ತಂತ್ರಾಂಶ (ಸಪ್ಲೈ-ಚೈನ್-ಮ್ಯಾನೇಜ್ಮೆಂಟ್) ಅನ್ನು ಡೆಲ್ಲಾಯ್ಟ್ ಅವಭಿವೃದ್ದಿ ಪಡಿಸಿದೆ.
www.kseb.in ಕೂಡ ಮುಕ್ತ ತಂತ್ರಾಂಶ ಜೂಮ್ಲಾ (Joomla) ದ ಮೇಲೆ ಅಭಿವೃದ್ದಿ ಪಡಿಸಲಾಗಿದ್ದು, ಕಳೆದ ವರ್ಷವಷ್ಟೇ ಬಿಡುಗಡೆಯಾಗಿದೆ.
ಇದರ ಹೆಚ್ಚುವರಿ ಮಾಹಿತಿಯನ್ನು ಲಿನಕ್ಸ್ ಫಾರ್ ಯು ಮ್ಯಾಗಜೀನ್ನ ಈ ವರದಿಯಲ್ಲಿ ಕಾಣಬಹುದು.
ಇಂತಹ ಮಾದರಿಗಳು ಕರ್ನಾಟಕದ ವಿದ್ಯುತ್ ಮಂಡಲಿಗೆ ಯಾಕೆ ತಲುಪುವುದಿಲ್ಲ? ಕೋಟಿಗಟ್ಟಲೆ ಹಣವನ್ನು ಯಾವುದೋ ವಿದೇಶ ಪ್ರವಾಸಕ್ಕೆ ಗುಂಪುಗೂಡಿಕೊಂಡು ಹೋಗುವುದರ ಬದಲು, ಇಂತಹ ವಿಚಾರಗಳಲ್ಲಿ ಮನಸ್ಸಿಟ್ಟು ಕೆಲಸ ಮಾಡಿದರೆ ಇಲಾಖೆಗೆ ಹಣದ ಉಳಿತಾಯವಾಗುವುದರ ಜೊತೆಗೆ, ಉಳಿಸಿದ ಹಣದಲ್ಲಿ ತಮ್ಮದೇ ಸದೃಡ ತಂತ್ರಜ್ಞರ ತಂಡ ಕಟ್ಟಬಹುದಲ್ಲವೇ? ನಮ್ಮ ವಿದ್ಯುತ್ ತೊಂದರೆಗಳಿಗೆ ಪರ್ಯಾಯ ವ್ಯವಸ್ಥೆಗಳ ಅನ್ವೇಷಣೆ ಮಾಡಬಹುದಲ್ಲವೇ?
Linuxaayana|ಲಿನಕ್ಸಾಯಣ by Omshivaprakash H.L | ಓಂಶಿವಪ್ರಕಾಶ್ ಎಚ್.ಎಲ್ is licensed under a Creative Commons Attribution-NonCommercial-NoDerivs 3.0 Unported License.
Based on a work at linuxaayana.net.
Permissions beyond the scope of this license may be available at https://linuxaayana.net.
ನಿಮ್ಮ ಪ್ರತಿಕ್ರಿಯೆಗಳು